राजन कुमार बानिया
पर्सा १४ बैशाख
तलब नपाएको भन्दै पर्साको छिपहरमाई गाउँपालिकाका कर्मचारीहरूले गाउँपालिका कार्यालयमा तालाबन्दी गरि धर्ना बसेका छन् । गाउँपालिका तथा वडा कार्यालयहरूमा कार्यरत करारका कर्मचारीहरू ७ महिनादेखि तलब नपाएको गुनासो गर्दै आन्दोलनमा उत्रिएका हुन। कर्मचारीहरू बिहान ९ बजेदेखि गाउँपालिकाको भिस्वास्थित कार्यालय अगाडि धर्नामा बसेका छन् भने कार्यालयका सम्पूर्ण कामकाज ठप्प पारेका छन् । उनीहरूले लामो समयदेखि तलब नपाउँदा दैनिक जीवन सञ्चालनमै समस्या भएको बताएका छन ।
वडा नं. ५ का कम्प्युटर अपरेटर लालबाबु महमदका अनुसार आफूहरू कात्तिक महिनादेखि तलबविहीन भएका छन् । उनले भने, “लामो समयदेखि तलब नपाएर हामी समस्यामा परेका छौं । माघ महिनादेखिको म्याद पनि थप भएको छैन र कात्तिक महिनादेखि अहिलेसम्म तलब पनि पाएका छैनौं ।
कर्मचारीहरूले तलब निकासाका लागि प्रमुख प्रशासकीय अधिकृत र लेखापालसँग पटक–पटक सम्पर्क गरे पनि कुनै सुनुवाइ नभएको गुनासो गरेका छन् । उनीहरूका अनुसार गाउँपालिका र मातहतका वडा कार्यालयहरूमा कार्यरत करिब ५० जना कर्मचारी ७ महिनादेखि तलबविहीन छन।
कर्मचारीहरूको धर्नाका कारण गाउँपालिका कार्यालयसहित पाँचवटै वडा कार्यालयको सेवा प्रवाह प्रभावित भएको छ । यसबाट सेवाग्राहीहरू आवश्यक सेवा लिनबाट वञ्चित भएका छन।
यस विषयमा प्रतिक्रिया लिन गाउँपालिकाका प्रमुख प्रशासकीय अधिकृत कादिर बाबु देवानसँग सम्पर्क गर्न खोज्दा फोन उठेन । यद्यपि, देवानको स्थानमा संजीव कुमार साहको सरुवा भएकाे वताइए पनि उनी हालसम्म हाजिर भएका छैनन।
राष्ट्रिय दैनिक एक लोकप्रिय नेपाली समाचार पोर्टल हो। हामी सत्य तथ्य निश्पक्ष र सन्तुलित समाचार सम्प्रेषण गर्ने तर्फ उद्दत छौँ । हाम्रा टोल,समाज, शहर वा आम जनताका चुलो चौको देखि सदन सम्म अथवा समाजका उदाहरणीय ब्यक्ति, रास्ट्रका पहरेदार हरेक बिषय हाम्रा समाचारका श्रोत हुन् । आवाज बिहिनहरुको आवाजमा साथ अनि सरकारको बेथितिमा हाम्रो निगरानी हुनेछ । हामी राजनितीको रंग भर्दैनौं तर राजनितीको चेतना अवश्य भर्ने छौं ।
