राष्ट्रिय दैनिक/ नवलपरासी , असोज ६ पश्चिम नवलपरासीका बासिन्दा तीन वर्षदेखि पुनःपुनः डुबान, बजेटको पारदर्शिता र वाचा पूरा नगरेको आरोप पश्चिम नवलपरासीको पाल्हिनन्दन गाउँपालिका – १ र सरावल गाउँपालिका-६ तथा ७ का क्षेत्रहरू हरेक वर्ष वर्षायाममा डुबानमा पर्दै आएका छन्। बाढी र कटानीले धानबारी नष्ट हुँदा किसानहरू आर्थिक संकटमा धकेलिँदै आएका छन्। तर समस्या समाधानका लागि न त स्थानीय तह, न प्रदेश, न केन्द्र सरकारले प्रभावकारी पहल गरेको स्थानीयवासीको गुनासो छ। स्थानीयका अनुसार वडाहरूमा हरेक वर्ष करिब १ करोड रुपैयाँभन्दा बढी बजेट विनियोजन हुने भए पनि त्यसको प्रयोगबारे स्पष्ट जानकारी छैन। चुनावको बेला विभिन्न वाचा गरिने तर समयमै कार्यान्वयन नहुने गुनासो छ। गुणस्तरहीन बाँध र ठेक्कामा अनियमितताको आरोप :- पाल्हिनन्दन–१ मा बाँध निर्माणका लागि प्रदेश र पालिकाबाट लाखौँ रुपैयाँ आएको भए पनि गुणस्तरहीन बाँध बनाइने र कमिसनको खेलमा ठेक्का दिने गरेको स्थानीयवासीको आरोप छ। बाढी रोक्ने उद्देश्यले बनेका संरचना प्रभावकारी नभएपछि हरेक वर्ष बस्ती र खेती नै जोखिममा पर्ने गरेको उनीहरूको भनाइ छ। अध्यक्षका वाचा अपूरा :- तीन वर्षअघि राष्ट्रिय दैनिकलाई दिएको अन्तर्वार्तामा पाल्हिनन्दन–१ का वडा अध्यक्षले नदी कटानी रोक्ने, विद्यालय सुधार गर्ने र आवास उपलब्ध गराउनेजस्ता वाचा गरेका थिए। तर तीमध्ये कुनै काम पूरा नभएको स्थानीयवासीले बताउँदै आएका छन्। सडक, विद्यालय र आवासमा बेवास्ता :- महेशपुरदेखि सुनारीसम्मको सडकमा ठूला–ठूला खाल्टाखुल्टी र जोखिमपूर्ण अवस्था रहेको भए पनि न वडा, न पालिकाले वास्ता गरेको स्थानीयको आरोप छ। दलित समुदायका प्रतिनिधिहरूले आवास आफन्त र नजिकका मान्छेलाई मात्र दिइने गरेको गुनासो गर्दै आएका छन्। विद्यालयमा पनि सुधार नआएको भन्दै उनीहरूले आक्रोश पोखेका छन्। जनप्रतिवद्धता र पारदर्शितामा प्रश्न :- डुबान, नदी कटानी, विद्यालय र सडक समस्याको समाधान नभई बजेटको पारदर्शिता र जनप्रतिवद्धताबारे स्थानीयवासी अझै प्रश्न उठाइरहेका छन्। उनीहरूका अनुसार सरकारका सबै तहको बेवास्ताले समस्या जटिल बन्दै गएको छ। राष्ट्रिय दैनिक राष्ट्रिय दैनिक एक लोकप्रिय नेपाली समाचार पोर्टल हो। हामी सत्य तथ्य निश्पक्ष र सन्तुलित समाचार सम्प्रेषण गर्ने तर्फ उद्दत छौँ । हाम्रा टोल,समाज, शहर वा आम जनताका चुलो चौको देखि सदन सम्म अथवा समाजका उदाहरणीय ब्यक्ति, रास्ट्रका पहरेदार हरेक बिषय हाम्रा समाचारका श्रोत हुन् । आवाज बिहिनहरुको आवाजमा साथ अनि सरकारको बेथितिमा हाम्रो निगरानी हुनेछ । हामी राजनितीको रंग भर्दैनौं तर राजनितीको चेतना अवश्य भर्ने छौं ।
