बिनाेद निगम / नवलपरासी ,१२ बैशाख
जम्मू कश्मीरको पहलगाममा पर्यटकहरूमाथि भएको जघन्य आतंकवादी हमलापछि भारत-नेपाल अन्तर्राष्ट्रिय सीमामा सुरक्षा सतर्कता कडा पारिएको छ।
पश्चिम नवलपरासीको सीमावर्ती क्षेत्रमा रहेको भारतको ठूठीबारी नाकामा भारतीय प्रहरी र सशस्त्र सीमा बल (एसएसबी) को संयुक्त टोलीले व्यापक चेकजाँच अभियान र नियमित गस्ती तीव्र बनाएका छन्।
नो म्यान्स ल्याण्ड हुँदै सीमा पार गर्ने प्रत्येक व्यक्तिको परिचयपत्र अनिवार्य गरिएको छ। सोधपुछपछि मात्र सवारी साधनसहित व्यक्तिहरूलाई भारतीय भूभागमा प्रवेश दिइँदैछ। परिचयपत्र नभएका व्यक्तिलाई सीमा पार गर्न पूर्ण रूपमा निषेध गरिएको छ।
सुरक्षा निकायहरूले सीमामा हुने सबै गतिविधिहरूको नजिकबाट निगरानी गरिरहेका छन्। नेपालबाट भारत आउँदा र भारतबाट नेपाल फर्किँदा दुवै दिशामा मानिसहरूको सूक्ष्म खोजबिन भइरहेको छ। कुनै पनि शंकास्पद गतिविधि देखिएमा तुरुन्त कारवाही हुने सुरक्षा स्रोतहरूले जनाएका छन्।
सीमा क्षेत्रमा यस्तो उच्च सतर्कता आतंकवादविरुद्धको रोकथाम र आमनागरिकको सुरक्षाको सुनिश्चितताका लागि लिइएको बताइएको छ। स्थानीय बासिन्दाहरूलाई सतर्क रहन र कुनै पनि अस्वाभाविक गतिविधि देखिएमा सुरक्षाकर्मीलाई जानकारी गराउन आग्रह गरिएको छ।
राष्ट्रिय दैनिक एक लोकप्रिय नेपाली समाचार पोर्टल हो। हामी सत्य तथ्य निश्पक्ष र सन्तुलित समाचार सम्प्रेषण गर्ने तर्फ उद्दत छौँ । हाम्रा टोल,समाज, शहर वा आम जनताका चुलो चौको देखि सदन सम्म अथवा समाजका उदाहरणीय ब्यक्ति, रास्ट्रका पहरेदार हरेक बिषय हाम्रा समाचारका श्रोत हुन् । आवाज बिहिनहरुको आवाजमा साथ अनि सरकारको बेथितिमा हाम्रो निगरानी हुनेछ । हामी राजनितीको रंग भर्दैनौं तर राजनितीको चेतना अवश्य भर्ने छौं ।
