सन्जय कुशवहा/ नवलपरासी ,५ जेठ
पश्चिम नवलपरासीमा सशस्त्र प्रहरीको गोली लागेर एक युवकको मृत्यु भएको विषयमा छानविन गर्न गृहमन्त्रालयले छानविन समिति गठन गरेको छ ।
बुधबार बसेको गृहमन्त्री स्तरीय निर्णयले गृहमन्त्रालयका सहसचिव कृष्ण प्रसाद पन्तको संयोजकत्वमा ५ सदस्यिय समिति गठन गरेको पश्चिम नवलपरासीका प्रमुख जिल्ला अधिकारी धर्मेन्द्र मिश्रले जानकारी दिए ।
छानविन समितिमा सशस्त्र प्रहरीका डिआईजी किशोर प्रधान, नेपाल प्रहरीका एसएसपी मधुसुधन लुइटेल, गृहमन्त्रालयका उपसचिव माधव प्रसाद पोखरेल र राष्ट्रिय अनुसन्धानका उपअनुसन्धान निर्देशक शुसान्त शर्मा रहेका छन् ।
समितिले बिहीवारदेखि काम थालेर ७ दिन भित्र रायसहितको प्रतिवेदन बुझाउने छ । समितिलाई जिल्ला स्तरबाट सत्य तथ्य र निष्पक्ष छानविनका लागि पूर्ण सहयोग रहने प्रमुख जिल्ला अधिकारी मिश्रले जानकारी दिए ।
पश्चिम नवलपरासीको सीमावर्ती नाकाबाट भारत जाने खोज्दा प्रतापपुरका स्थानीय र शसस्त्र प्रहरीबीच बुधबार झडप हुँदा प्रतापपुर गाउँपालिका–६ का २३ वर्षिय अविनाश राजभरको शसस्त्र प्रहरीले चलाएको गोली लागेर मृत्यु भएको थियो । उनको उपचारको क्रममा बुटवल सिटी अस्पतालमा मृत्यु भएको थियो ।
राष्ट्रिय दैनिक एक लोकप्रिय नेपाली समाचार पोर्टल हो। हामी सत्य तथ्य निश्पक्ष र सन्तुलित समाचार सम्प्रेषण गर्ने तर्फ उद्दत छौँ । हाम्रा टोल,समाज, शहर वा आम जनताका चुलो चौको देखि सदन सम्म अथवा समाजका उदाहरणीय ब्यक्ति, रास्ट्रका पहरेदार हरेक बिषय हाम्रा समाचारका श्रोत हुन् । आवाज बिहिनहरुको आवाजमा साथ अनि सरकारको बेथितिमा हाम्रो निगरानी हुनेछ । हामी राजनितीको रंग भर्दैनौं तर राजनितीको चेतना अवश्य भर्ने छौं ।
