राष्ट्रिय दैनिक /नवलपरासी,९ असाेज
नेपाली कांग्रेसको १५औँ महाधिवेशनअन्तर्गत नवलपरासीको सुनवल नगर कार्यसमितिको नयाँ नेतृत्व चयनका लागि जारी नगर अधिवेशन अनिश्चितकालका लागि स्थगित भएको छ।
मतदाता नामावलीमा अनधिकृत फेरबदल र निर्वाचन तालिकामा किर्ते गरिएको भन्दै यज्ञप्रसाद पाण्डे पक्षले तीव्र विरोध जनाएपछि निर्वाचन प्रक्रिया रोकिएको हो।
सुनवलमा पूर्वमन्त्री देवेन्द्रराज कण्डेल र नेता भिम बहादुर थापा (भरत) निकट दुई प्यानल— यज्ञप्रसाद पाण्डे र यमलाल पाण्डे नेतृत्वका समूह—बीच तीव्र प्रतिस्पर्धा चुलिएको थियो।
प्यानलगत प्रतिस्पर्धा उत्कर्षमा पुगेकै समयमा गम्भीर धाँधलीको विषय सतहमा आएपछि निर्वाचन समितिले हाललाई सम्पूर्ण कार्यक्रम स्थगित गरेको छ।
विवादका मुख्य दुई कारण:
अनधिकृत रूपमा नामावली फेरबदल:
प्रत्येक वडाबाट छनोट भई आएका ३ जना प्रतिनिधि (१ महिलासहित) लाई कांग्रेसको विधान र निर्देशिका विपरीत रातारात मतदाता सूचीमा समावेश गरी मतदानको अधिकार दिइएको आरोप यज्ञप्रसाद पाण्डे पक्षले लगाएको छ। निर्देशिका अनुसार ती प्रतिनिधिहरू उम्मेदवार बन्न पाउने स्पष्ट व्यवस्था भए पनि उनीहरूलाई नगर प्रतिनिधि सरह मतदान गर्ने अधिकार हुँदैन।
* निर्वाचन तालिकामा किर्ते हस्ताक्षर:
उद्घाटन सत्र सम्पन्न भइसकेको अवस्थामा निर्वाचन समितिले तालिकाको समय र विवरण खाली छाडेर प्रतिनिधिहरूसँग पूर्वहस्ताक्षर गराएको भेटिएपछि विवाद थप उग्र बनेको हो।
रात्रिकालीन मतदानको प्रयास र समावेशी लोकतन्त्रमाथि प्रश्न
नेपाली कांग्रेसको विधान र नेपालको संविधानले महिला, ज्येष्ठ नागरिक, अपाङ्गता भएका व्यक्ति तथा सीमान्तकृत समुदायको समान र सुरक्षित सहभागिता सुनिश्चित गरेको छ। तर, निर्वाचन समितिले राति ८ बजे वा रात्रिकालीन समयमा मतदान गराउन खोजेको भन्दै प्रतिनिधिहरूले कडा आपत्ति जनाएका छन्।
अँध्यारोको फाइदा उठाएर मतपत्र र नामावलीमा चलखेल हुन सक्ने तथा धाँधलीको जोखिम उच्च रहने प्रतिनिधिहरूको भनाइ छ। त्यसैगरी, रातिको समयमा अशक्त, वृद्धवृद्धा र महिलाहरूलाई मतदान केन्द्रसम्म पुग्न, लाइनमा बस्न र सुरक्षित रूपमा घर फर्कन निकै कठिन हुने भएकाले दिउँसोको उज्यालोमै पारदर्शी ढङ्गले मतदान हुनुपर्ने अडान उठेपछि अधिवेशन स्थगनको मोडमा पुगेको हो।
हाललाई रोकिएको अधिवेशनलाई सर्वस्वीकार्य र नियमानुकूल कसरी अगाडि बढाउने भन्ने विषयमा अन्योल कायमै छ।
राष्ट्रिय दैनिक एक लोकप्रिय नेपाली समाचार पोर्टल हो। हामी सत्य तथ्य निश्पक्ष र सन्तुलित समाचार सम्प्रेषण गर्ने तर्फ उद्दत छौँ । हाम्रा टोल,समाज, शहर वा आम जनताका चुलो चौको देखि सदन सम्म अथवा समाजका उदाहरणीय ब्यक्ति, रास्ट्रका पहरेदार हरेक बिषय हाम्रा समाचारका श्रोत हुन् । आवाज बिहिनहरुको आवाजमा साथ अनि सरकारको बेथितिमा हाम्रो निगरानी हुनेछ । हामी राजनितीको रंग भर्दैनौं तर राजनितीको चेतना अवश्य भर्ने छौं ।
