रुपन्देही ,२० जेठ– लुम्बिनी प्रदेश सरकारमा नेकपा एमालेबाट सहभागी चार जना मन्त्रीको राजीनामा स्वीकृत भएको छ।
भौतिक पूर्वाधार विकास मन्त्री भूमिश्वर ढकाल, स्वास्थ्य मन्त्री खेमबहादुर सारु मगर, कृषि, भूमि व्यवस्था तथा सहकारी मन्त्री दिनेश पन्थी तथा ऊर्जा, जलस्रोत तथा सिँचाइ मन्त्री सीता शर्मा चौधरी ले बुधबार बिहान सामूहिक रूपमा राजीनामा दिएका थिए।
मुख्यमन्त्री चेतनारायण आचार्यले चारै जनाको राजीनामा स्वीकृत गर्दै नयाँ मन्त्री नियुक्तिको प्रक्रिया अघि बढाएका छन्। मुख्यमन्त्रीका प्रेस सल्लाहकार दशरथ घिमिरेका अनुसार बिहान प्राप्त राजीनामा दिउँसो स्वीकृत गरिएको हो।
एमाले स्रोतका अनुसार नयाँ मन्त्रीका रूपमा बाँकेका रत्नबहादुर खत्री, गुल्मीका डिल्लीराज भुसाल, अर्घाखाँचीका रामजी घिमिरे र रुपन्देहीका तुलसीप्रसाद चौधरी लाई मन्त्री बनाउने तयारी गरिएको छ।
यद्यपि, प्रदेश प्रमुख कृष्णबहादुर घर्ती मगर प्रदेश बाहिर रहेकाले तत्काल नयाँ मन्त्रीहरूको शपथ कार्यक्रम नहुने भएको छ।
लुम्बिनी प्रदेशमा एमाले संसदीय दलका नेता चेतनारायण आचार्यको नेतृत्वमा सरकार सञ्चालन भइरहेको छ। सरकारमा नेपाली कांग्रेसका पाँच जना मन्त्री पनि सहभागी छन्।
एमालेले आफ्ना मन्त्री फिर्ता बोलाएर मन्त्रिपरिषद् पुनर्गठन प्रक्रिया अघि बढाएपछि कांग्रेसबाट सरकारमा रहेका मन्त्रीमाथि समेत राजनीतिक दबाब बढेको बताइएको छ।
राष्ट्रिय दैनिक एक लोकप्रिय नेपाली समाचार पोर्टल हो। हामी सत्य तथ्य निश्पक्ष र सन्तुलित समाचार सम्प्रेषण गर्ने तर्फ उद्दत छौँ । हाम्रा टोल,समाज, शहर वा आम जनताका चुलो चौको देखि सदन सम्म अथवा समाजका उदाहरणीय ब्यक्ति, रास्ट्रका पहरेदार हरेक बिषय हाम्रा समाचारका श्रोत हुन् । आवाज बिहिनहरुको आवाजमा साथ अनि सरकारको बेथितिमा हाम्रो निगरानी हुनेछ । हामी राजनितीको रंग भर्दैनौं तर राजनितीको चेतना अवश्य भर्ने छौं ।
