राष्ट्रिय दैनिक / नवलपरासी ,१० फागुन पश्चिम नवलपरासी निर्वाचन क्षेत्र नं. १ का प्रतिनिधिसभा सदस्य पदका उम्मेदवार विजय कंडेलले पर्यटन र कृषिको आधुनिक विकासमार्फत नवलपरासीलाई देशकै नमुना र समृद्ध जिल्ला बनाउने उद्घोष गर्नुभएको छ। उज्यालो नेपालका तर्फबाट युवा उम्मेदवार रहनुभएका कंडेलले पत्रकार भेटघाटमा जिल्लाको आर्थिक विकासका लागि आफूसँग स्पष्ट र व्यावहारिक कार्यसूची रहेको दाबी गर्नुभयो। चुनावी अभियान तीव्र उज्यालो नेपालका जिल्ला संयोजक अमुल पाण्डेको नेतृत्वमा अहिले चुनावी प्रचार प्रसार र कार्यकर्ता भेटघाट तीव्र पारिएको छ। संयोजक पाण्डेका अनुसार चुनावी घोषणापत्र तयार गर्दै घरदैलो कार्यक्रम जारी छ। “म भाषण होइन, देखिने र छोइने परिवर्तन गर्न चुनावी मैदानमा आएको हुँ,” कंडेलले आफ्नो प्रतिबद्धता दोहोर्याउनुभयो। को हुन् विजय कंडेल? सुस्ता–३, नवलपरासीका स्थायी बासिन्दा कंडेल अंग्रेजी साहित्यमा स्नातकोत्तर (MA) हुनुहुन्छ। केही वर्ष अस्ट्रेलियामा बसेर त्यहाँको विकास र प्रविधिलाई नजिकबाट अनुभव गर्नुभएका कंडेल स्वदेशमै केही गर्ने उद्देश्यले नेपाल फर्कनुभएको हो। हाल उहाँ एक सफल उद्यमीको रूपमा स्थापित हुनुहुन्छ: .व्यावसायिक संलग्नता: काठमाडौं र चितवनमा ‘हाइजेनिक मिट सेन्टर’, एचएमसी फुड्स, हाइजेनिक एग्रो टुरिजम फार्म, र होटल तथा रेस्टुरेन्ट व्यवसायमा उहाँको संलग्नता छ। ·सामाजिक अभियान: यसअघि उहाँले काठमाडौंलाई धुलोरहित बनाउन ‘जाग्यो नेपाल’ अभियानको नेतृत्व गर्नुभएको थियो। उहाँले २०७९ को निर्वाचनमा काठमाडौं क्षेत्र नं. ५ बाट समेत प्रतिस्पर्धा गर्नुभएको थियो। राजनीतिमा आउनुको कारण “विगतमा निर्वाचित नेताहरूले जनताको प्रतिनिधि भएको बिर्सेर व्यक्तिगत स्वार्थमा लागेका कारण देशले दुःख पायो,” कंडेलले भन्नुभयो। उहाँले देशको थलिएको अर्थतन्त्र, कुटनीति र प्रशासनिक विकृति अन्त्य गर्न युवाहरूको नेतृत्व अनिवार्य रहेको तर्क गर्नुभयो। युवालाई व्यवसायसँग जोड्ने र उपलब्ध साधन–स्रोतको उच्चतम सदुपयोग गरी ‘किसानलाई मालिक’ बनाउने आफ्नो मुख्य लक्ष्य रहेको उहाँको भनाइ छ। उज्यालो नेपाल पार्टीका संस्थापक केन्द्रीय सदस्यसमेत रहनुभएका कंडेलले जिल्लाको समृद्धिका लागि आफ्नो स्पष्ट खाकासहित चुनावी मैदानमा उत्रिने निर्णय लिनुभएको हो। चुनावी अभियान उज्यालो नेपालका जिल्ला संयोजक अमुल पाण्डेका अनुसार घरदैलोमार्फत अभियान जारी छ ।”हामी वाचा होइन, काम गरेर देखाउन आएका हौं,” संयोजक पाण्डेले बताउनुभयो। निर्वाचनका मुख्य एजेन्डाहरू कंडेलले नवलपरासी–१ का लागि पर्यटन, कृषि र प्रविधिलाई मुख्य आधार बनाउनुभएको छ: १. पर्यटन विकास: रामग्राम स्तुप, त्रिवेणी धाम र सुस्ता क्षेत्रलाई पर्यटकीय हब बनाउने। २. कृषिमा आधुनिकरण: उखु, केरा र धानको न्यूनतम समर्थन मूल्य (MSP) कार्यान्वयन गर्ने। ३. डिजिटल सुशासन: ‘Ujyalo Nawalparasi App’ मार्फत जनताका गुनासो ४८ घण्टाभित्र सम्बोधन गर्ने र सडक निर्माणको डिजिटल निगरानी गर्ने। ४. रोजगारी: गाउँमै ‘स्किल हब’ स्थापना गरी युवाहरूलाई आईटी र प्राविधिक शिक्षामा दक्ष बनाउने। पर्यटनलाई आर्थिक मेरुदण्ड बनाइने उम्मेदवार कंडेलले नवलपरासीका ऐतिहासिक र धार्मिक स्थलहरूको विकास नै जिल्लाको ठूलो पहिचान भएको बताउनुभयो। “रामग्राम स्तुप, त्रिवेणी धाम, मदार बाबा, अनोमा घाट, पाल्ही भगवती, महलपोखरी र सुस्ता जस्ता क्षेत्रहरूको उचित प्रचार–प्रसार र पूर्वाधार विकास गर्न सके यहाँ पर्यटकको घुइँचो लाग्नेछ,” उहाँले भन्नुभयो। पर्यटनलाई स्थानीय रोजगारीसँग जोड्न आफूले विशेष योजना ल्याएको उहाँको तर्क थियो। “किसान अब मालिक बन्नेछन्” कृषि क्षेत्रमा रहेको बिचौलिया प्रथाको अन्त्य गर्दै कंडेलले कृषकलाई ‘मालिक’ बनाउने ठोस खाका प्रस्तुत गर्नुभयो। उहाँका अनुसार उखु, केरा, धान र दूध जस्ता उत्पादनमा न्यूनतम समर्थन मूल्य सुनिश्चित गर्ने कानुन निर्माण गरिनेछ। उहाँले भन्नुभयो, “हाम्रो पार्टीले कृषिमा क्रान्ति ल्याउने नीति लिएको छ, अब किसानले पसिनाको उचित मूल्य पाउनेछन्।” प्रविधिमैत्री सुशासन र ‘उज्यालो नवलपरासी एप’ परम्परागत राजनीतिभन्दा फरक ढंगले अघि बढेका कंडेलले मतदातासँग सिधा जोडिन ‘Ujyalo Nawalparasi App’ को अवधारणा ल्याउनुभएको छ। ४८ घण्टाभित्र जनताका गुनासो सम्बोधन गर्ने र सांसदको कामको मासिक ‘रिपोर्ट कार्ड’ सार्वजनिक गर्ने प्रतिबद्धता उहाँले जनाउनुभएको छ। यस्तै, सडक निर्माणमा हुने ढिलासुस्ती रोक्न मोबाइलबाटै डिजिटल निगरानी गर्ने प्रणाली बसाल्ने उहाँको योजना छ। सामाजिक सुधार र पूर्वाधारमा जोड कण्डेलले शिक्षा, स्वास्थ्य र सामाजिक समानताका विषयलाई पनि प्राथमिकतामा राख्नुभएको छ: शिक्षा र स्वास्थ्य: हरेक विद्यालयसम्म कन्क्रिट बाटो पुर्याउने र गाउँमै विशेषज्ञ सेवाका लागि ‘मोबाइल मेडिकल युनिट’ सञ्चालन गर्ने। समानता: जातीय छुवाछुत र विभेद विरुद्ध शून्य सहनशीलताको नीति अपनाउने। पूर्वाधार: शुद्ध खानेपानी, हरित गाउँ निर्माण र विपन्न परिवारलाई बिजुली महसुलमा सहुलियत दिने। राष्ट्रिय दैनिक राष्ट्रिय दैनिक एक लोकप्रिय नेपाली समाचार पोर्टल हो। हामी सत्य तथ्य निश्पक्ष र सन्तुलित समाचार सम्प्रेषण गर्ने तर्फ उद्दत छौँ । हाम्रा टोल,समाज, शहर वा आम जनताका चुलो चौको देखि सदन सम्म अथवा समाजका उदाहरणीय ब्यक्ति, रास्ट्रका पहरेदार हरेक बिषय हाम्रा समाचारका श्रोत हुन् । आवाज बिहिनहरुको आवाजमा साथ अनि सरकारको बेथितिमा हाम्रो निगरानी हुनेछ । हामी राजनितीको रंग भर्दैनौं तर राजनितीको चेतना अवश्य भर्ने छौं ।
