राष्ट्रिय दैनिक / नवलपरासी ,२२ माघ
आसन्न प्रतिनिधिसभा निर्वाचनलाई लक्षित गरी पश्चिम नवलपरासीमा गरिएको निर्वाचन प्रहरी भर्ना प्रक्रिया गम्भीर प्रश्नको घेरामा परेको छ । औपचारिक रूपमा कुनै आन्दोलन वा घेराउ नभए पनि अन्तिम नतिजापछि जिल्लाका युवामाझ व्यापक असन्तुष्टि देखिएको छ ।
भर्ना प्रक्रियामा पूर्व म्यादी (भूपू म्यादी) तथा अनुभवी उम्मेदवारलाई प्राथमिकता दिने भनिए पनि नतिजाले त्यसको विपरीत संकेत गरेको गुनासो आएको छ । विगतका निर्वाचन तथा सुरक्षा ड्युटीमा खटिइसकेका धेरै अनुभवी उम्मेदवार मुख्य सूचीबाट बाहिरिएर वैकल्पिक सूचीमा सीमित हुँदा राजनीतिक तथा जनप्रतिनिधि पहुँच भएका उम्मेदवार मुख्य सूचीमा परेको आरोप छ ।
छनोट प्रक्रियामा सहभागी युवाहरूका अनुसार लिखित परीक्षा, स्वास्थ्य परीक्षण र शारीरिक जाँच पार गरेका उम्मेदवारहरू अन्तर्वार्तामा सामान्य र औपचारिक प्रश्नमै सीमित मूल्यांकनपछि छनोटबाट बाहिरिनु परेको छ । यसले प्रक्रिया औपचारिकतामा सीमित र नतिजा पूर्वनिर्धारित जस्तो देखिएको आशंका बढाएको उनीहरूको भनाइ छ ।
असन्तुष्ट युवाहरूले फेल भएका उम्मेदवारलाई राजनीतिक र जनप्रतिनिधिकाे मिलेमतोमा पास गराइएको तथा अनुभव भएका उम्मेदवारलाई जानाजान वैकल्पिकमा राखिएको आरोप लगाएका छन् ।
स्थानीय युवामाझ व्यंग्य चलिरहेको छ—
“यहाँ अनुभव योग्यता होइन, सिफारिस नै प्रमाणपत्र बनेको छ।”
जिल्लाका विभिन्न पालिकाका युवाहरूले दुई साताभन्दा बढी समय पढाइ, रोजगारी र दैनिक काम छोडेर तयारी गरे पनि अन्तिम नतिजाले आफूलाई उपेक्षित बनाएको अनुभूति भएको बताएका छन् । उनीहरूका अनुसार यस्तो अभ्यासले राज्य संयन्त्रप्रतिको भरोसा कमजोर बनाउने खतरा पैदा गरेको छ ।
यता सम्बन्धित निकायले भने छनोट प्रक्रिया नियम, मापदण्ड र पारदर्शिताअनुसार सम्पन्न भएको दाबी गरेको छ ।
तर प्रश्न भने यथावत् छ—
नियम एउटै हुँदा अनुभव भएका उम्मेदवार वैकल्पिक र पहुँच भएका उम्मेदवार मुख्य सूचीमा कसरी परे ?
निर्वाचन सुरक्षाकर्मी छनोट नै निष्पक्ष निर्वाचनको आधार हो ।
तर यही आधारमै उठेका प्रश्नहरूले पश्चिम नवलपरासीमा हुने निर्वाचनको विश्वसनीयतामाथि गम्भीर बहस जन्माएको छ ।
यो विषय अब केवल भर्नाको विवाद होइन—
यो युवाको मेहनत, अनुभव र राज्यप्रतिको विश्वाससँग जोडिएको प्रश्न बनेको छ ।
राष्ट्रिय दैनिक एक लोकप्रिय नेपाली समाचार पोर्टल हो। हामी सत्य तथ्य निश्पक्ष र सन्तुलित समाचार सम्प्रेषण गर्ने तर्फ उद्दत छौँ । हाम्रा टोल,समाज, शहर वा आम जनताका चुलो चौको देखि सदन सम्म अथवा समाजका उदाहरणीय ब्यक्ति, रास्ट्रका पहरेदार हरेक बिषय हाम्रा समाचारका श्रोत हुन् । आवाज बिहिनहरुको आवाजमा साथ अनि सरकारको बेथितिमा हाम्रो निगरानी हुनेछ । हामी राजनितीको रंग भर्दैनौं तर राजनितीको चेतना अवश्य भर्ने छौं ।
