उमेश बि.क / नवलपरासी ,३१ असाेज पश्चिम नवलपरासीको सरावल गाउँपालिका–१, तुलसीनगरस्थित सिमसार क्षेत्र पछिल्ला वर्षहरूमा स्थानीय तथा बाह्य पर्यटकका लागि नयाँ आकर्षणको केन्द्र बनेको छ। हरियाली वन, स्वच्छ पानी, चराचुरुङ्गीको मधुर आवाज र टाढा देखिने पहाडको मनोरम दृश्यले यो क्षेत्रलाई प्राकृतिक सौन्दर्यको प्रतीक बनाएको छ। स्थानीय बासिन्दा देवानन्द फौजदारका अनुसार पहिले यो स्थान घना झाडीले ढाकिएको निर्जन भूभाग थियो। तर पछिल्ला वर्षमा पानीको स्थायी स्रोत बनेपछि यसले प्राकृतिक सिमसारको रूप लिएको हो। अहिले यस क्षेत्र वरिपरि माछापालन, चराचुरुङ्गी अवलोकन र पिकनिक जस्ता क्रियाकलापहरू बढ्दो क्रममा छन्। फौजदारले भने “यहाँ बिहान र बेलुकाको दृश्य अत्यन्त मनमोहक हुन्छ। डाँडाको छायाँ पोखरीमा परेर देखिने दृश्यले जो कोहीलाई मोहनी पार्छ।” यस क्षेत्रको सम्भावनालाई देख्दै सरावल गाउँपालिकाले पर्यटन प्रवर्द्धनका लागि विशेष प्राथमिकता दिएको जनाएको छ। गाउँपालिकाका अध्यक्ष सुखाडी प्रसाद चौधरीका अनुसार निकट भविष्यमै सिमसार क्षेत्रमा घुमफिर पार्क, विश्रामस्थल र जलपंछी अवलोकन टावर निर्माण गर्ने योजना अघि सारिएको छ। पर्यावरणविद्हरूले पनि यस्तो प्राकृतिक सिमसार क्षेत्रको संरक्षण र दिगो पर्यटन विकास सँगसँगै अघि बढाउनुपर्ने सुझाव दिएका छन्। उनीहरूको भनाइमा सिमसारले जैविक विविधता संरक्षणमा महत्वपूर्ण योगदान पुर्याउँछ, त्यसैले योजनाबद्ध व्यवस्थापन आवश्यक छ। सोहीबीच स्थानीय युवाहरूले सामाजिक सञ्जालमार्फत सिमसार क्षेत्रको तस्बिर र भिडियोहरू भाइरल बनाउँदै प्रचार–प्रसार गरिरहेका छन्। यसको परिणामस्वरूप अहिले तुलसीनगर सिमसार नवलपरासी पश्चिमको नयाँ पर्यटन गन्तव्यको रूपमा परिचित हुँदै गएको छ। राष्ट्रिय दैनिक राष्ट्रिय दैनिक एक लोकप्रिय नेपाली समाचार पोर्टल हो। हामी सत्य तथ्य निश्पक्ष र सन्तुलित समाचार सम्प्रेषण गर्ने तर्फ उद्दत छौँ । हाम्रा टोल,समाज, शहर वा आम जनताका चुलो चौको देखि सदन सम्म अथवा समाजका उदाहरणीय ब्यक्ति, रास्ट्रका पहरेदार हरेक बिषय हाम्रा समाचारका श्रोत हुन् । आवाज बिहिनहरुको आवाजमा साथ अनि सरकारको बेथितिमा हाम्रो निगरानी हुनेछ । हामी राजनितीको रंग भर्दैनौं तर राजनितीको चेतना अवश्य भर्ने छौं ।
