रंजीत शर्मा / नवलपरासी ,२३ फाल्गुन
पश्चिम नवलपरासीको पाल्हीनन्दन गाउँपालिका-२ हरपुरमा ११५ औं अन्तर्राष्ट्रिय नारी दिवसको अवसर पारेर महिलाहरूलाई लक्षित गरी निःशुल्क स्वास्थ्य शिविर तथा मनोपरामर्श कार्यक्रम सम्पन्न भएको छ।
“सबै महिला तथा बालिकाका लागि: अधिकार, समानता र सशक्तिकरण” भन्ने मूल नाराका साथ आयोजना गरिएको कार्यक्रममा साधारण स्वास्थ्य परीक्षण, महिलाहरूको स्वास्थ्य समस्याको जाँच तथा मनोसामाजिक परामर्श प्रदान गरिएको थियो।
शिविर पाल्हीनन्दन गाउँपालिकाको सहकार्य र यूनाइटेड मिसन टु नेपाल नवलपरासी क्लस्टरको सहयोगमा सुनवल सामुदायिक विकास केन्द्रद्वारा संचालित घरेलु हिंसा न्युनिकरणका लागि सामुदायिक मेलमिलाप तथा संवाद परियोजना र इन्द्रेणी सामाजिक विकास मञ्चद्वारा संचालित एकीकृत ग्रामीण सामुदायिक स्वास्थ्य परियोजना अन्तर्गत सञ्चालन गरिएको थियो। देवदह मेडिकल कलेज एण्ड रिसर्च इन्स्टिच्युट, देवदह-५, भलुहीको प्राविधिक सहयोगमा आयोजित कार्यक्रममा १० जना दक्ष तथा अनुभवी चिकित्सकहरू सम्मिलित थिए।
शिविरको उद्घाटन पाल्हीनन्दन गाउँपालिका-२ का वडा अध्यक्ष जगदीश प्रसाद गुप्ताको अध्यक्षता र उपाध्यक्ष फातुमा खातुन अन्सारी (सकिना) को प्रमुख आतिथ्यतामा सम्पन्न भयो। कार्यक्रममा एकता अन्तरधार्मिक शान्ति सञ्जालका अध्यक्ष श्रीकान्त मिश्र, कार्यपालिका सदस्य लीलावती हरिजन, वार्ड सदस्य आशामा खातुन लगायतको उपस्थिति रहेको थियो।
कार्यक्रम महिला शाखाका प्रमुख सुमन गुप्ताले सञ्चालन गरेका थिए भने परियोजना संयोजक कृष्ण पाण्डेले स्वागत मन्तव्य सहित कार्यक्रमको विषयमा प्रकाश पारेका थिए। शिविरबाट २ सयभन्दा बढी लाभान्वित भएका छन्।
राष्ट्रिय दैनिक एक लोकप्रिय नेपाली समाचार पोर्टल हो। हामी सत्य तथ्य निश्पक्ष र सन्तुलित समाचार सम्प्रेषण गर्ने तर्फ उद्दत छौँ । हाम्रा टोल,समाज, शहर वा आम जनताका चुलो चौको देखि सदन सम्म अथवा समाजका उदाहरणीय ब्यक्ति, रास्ट्रका पहरेदार हरेक बिषय हाम्रा समाचारका श्रोत हुन् । आवाज बिहिनहरुको आवाजमा साथ अनि सरकारको बेथितिमा हाम्रो निगरानी हुनेछ । हामी राजनितीको रंग भर्दैनौं तर राजनितीको चेतना अवश्य भर्ने छौं ।
