नवलपरासी |१३ साउन
औद्योगिक हबको रूपमा विकास भएको पश्चिम नवलपरासीको रामग्राममा १ अर्ब रुपैयाँको लगानीमा शिशुहरूका लागि प्रयोगमा आउने न्यानो र टेन्डर टच नामक डाइपर उद्योग सञ्चालनमा आएको छ ।
बज्रेश्वरी इन्डिस्ट्रिज प्रालिले भैरहवा परासी औद्योगिक करिडोरमा बहुराष्ट्रिय कम्पनीसँग प्रतिस्पर्धा गर्न सक्ने सरसफाईमा प्रयोग गरिने डाइपर बजारमा ल्याएको हो ।
उद्योगले शुक्रवार रुपन्देहीको भैरहवामा पत्रकार सम्मेलन तथा आफ्ना डिलरका प्रतिनिधिबीच उत्पादन सार्वजनिक गरेको छ । उच्च गुणस्तरका कच्चा पदार्थ प्रयोग गरी उत्पादन गरिएको कम्पनीले जनाएको छ ।
२ वर्षअघि उत्पादन शुरू गरेको उद्योगले उत्पादनको ४० प्रतिशत वस्तु निर्यात गर्दै आएको सञ्चालक एसपी ढकालले बताए । ‘हाम्रो उत्पादन अन्तर्राष्ट्रिय गुणस्तरको छ,’ ढकालले भने, ‘हाम्रो क्षमता प्रतिवर्ष २४ करोड पिस उत्पादन गर्नेछ । हाम्रो उद्योगले नेपालको कूल मागको ५० प्रतिशतसम्म थेग्छ ।’
सबै उमेर समूहका लागि आवश्यक पर्ने डाइपर उद्योगले उत्पादन गर्छ । विशेषगरी डाइपर नवजात शिशुको लागि बढी प्रयोग गरिन्छ । उद्योगले पहिलो वर्ष १ करोड ३० लाख पिस उत्पादन भारतमा बिक्री गरिसकेको छ । जसको मूल्य १३ करोड ५० लाख रुपैयाँ हुन आउँछ ।
उद्योगमा ५० जनाले प्रत्यक्ष रोजगारी पाएका छन् । नेपालमा हालसम्म ४ वटा डाइपर उद्योग सञ्चालनमा छन् । जसले गर्दा विदेशबाट भित्रिने डाइपरको आयात धेरै मात्रामा रोकिएको छ । बज्रेश्वरीले सन् २००५ बाट हुलास बिस्कुटबाट आफ्नो व्यवसाय शुरू गरेको थियो ।
बहुराष्ट्रिय कम्पनी जस्तै आफ्नो उत्पादन रहेकाले ब्राण्डिङ गरेर गाउँदेखि शहरका उपभोक्ताको समेत रोजाइमा परेको ढकालको दाबी छ । उनी आफ्नो उत्पादन र बहुराष्ट्रिय कम्पनीको उत्पादन दाँजेरै प्रयोग गर्न चुनौती दिन्छन् ।
‘हाम्रो उत्पादन राम्रो छ । विदेशीभन्दा सस्तो छ । उत्पादनदेखि प्याकेजिङसम्म विदेशीसँग प्रतिस्पर्धा गर्ने हैसियतको बनाएका छौं,’ उनले भने ।
राष्ट्रिय दैनिक एक लोकप्रिय नेपाली समाचार पोर्टल हो। हामी सत्य तथ्य निश्पक्ष र सन्तुलित समाचार सम्प्रेषण गर्ने तर्फ उद्दत छौँ । हाम्रा टोल,समाज, शहर वा आम जनताका चुलो चौको देखि सदन सम्म अथवा समाजका उदाहरणीय ब्यक्ति, रास्ट्रका पहरेदार हरेक बिषय हाम्रा समाचारका श्रोत हुन् । आवाज बिहिनहरुको आवाजमा साथ अनि सरकारको बेथितिमा हाम्रो निगरानी हुनेछ । हामी राजनितीको रंग भर्दैनौं तर राजनितीको चेतना अवश्य भर्ने छौं ।
