दाङ,३१ असार
दाङको रामपुर-घोराही सडकखण्डमा सोमबार साँझ भएको एक भीषण मोटरसाइकल दुर्घटनामा दुई किशोरको मृत्यु भएको छ। दुर्घटना सिस्ने खोला नजिकै भएको हो, जसमा १८ वर्षीय रोहित बिक र १६ वर्षीय निशान बिकको मृत्यु भएको जिल्ला प्रहरी कार्यालय दाङले जनाएको छ।
प्रहरीका अनुसार, दुवै किशोर घोराही उपमहानगरपालिका १७ भैँसेमा डेरा गरी बस्दै थिए। उनीहरू रामपुरबाट घोराहीतर्फ मोटरसाइकलमा सवार भएर आउँदै थिए। मोटरसाइकल (नम्बर रा ७ प ३२७०) बेलुका ७ बजेतिर सिस्नेखोलामा अनियन्त्रित भइ दुर्घटनामा परेको हो।
घटनाको बारेमा जानकारी दिँदै जिल्ला प्रहरी कार्यालय दाङका सूचना अधिकारी एवं प्रहरी नायव उपरीक्षक चक्रबहादुर शाहले भने, “दुर्घटनाको कारण तिब्र गति रहेको अनुमान गरिएको छ। गम्भीर घाइते भएका दुबै किशोरलाई तत्काल राप्ती स्वास्थ्य विज्ञान प्रतिष्ठान, घोराहीमा पुर्याइयो, जहाँ उपचारको क्रममा दुबैको मृत्यु भएको हो।”
मोटरसाइकल चलाउने किशोरहरूको जीवनलाई गम्भीर खतरा पर्ने जोखिममा राख्ने उच्च गतिका कारण यस्ता घटनाहरू बढिरहेका छन्। दुर्घटनामा परेका किशोरहरूको परिवारमा शोकको लहर फैलिएको छ।
प्रहरीले यस घटनाको अनुसन्धान गरिरहेको र यस्ता दुर्घटनाहरू रोक्नका लागि स्थानीय प्रशासन र ट्राफिक प्रहरीले सुरक्षा उपायहरू कडा बनाउने योजना बनाएको छ।
राष्ट्रिय दैनिक एक लोकप्रिय नेपाली समाचार पोर्टल हो। हामी सत्य तथ्य निश्पक्ष र सन्तुलित समाचार सम्प्रेषण गर्ने तर्फ उद्दत छौँ । हाम्रा टोल,समाज, शहर वा आम जनताका चुलो चौको देखि सदन सम्म अथवा समाजका उदाहरणीय ब्यक्ति, रास्ट्रका पहरेदार हरेक बिषय हाम्रा समाचारका श्रोत हुन् । आवाज बिहिनहरुको आवाजमा साथ अनि सरकारको बेथितिमा हाम्रो निगरानी हुनेछ । हामी राजनितीको रंग भर्दैनौं तर राजनितीको चेतना अवश्य भर्ने छौं ।
