काठमाडौं ,१६ भदौ
मध्यपूर्वमा सैन्य तनाव पुनः चुलिएसँगै अन्तर्राष्ट्रिय बजारमा कच्चा तेलको मूल्य तीव्र रूपमा बढेको छ। तेलको मूल्य बढेपछि लगानीकर्तामा भूराजनीतिक जोखिम र ब्याजदर वृद्धिको चिन्ता बढ्दा अमेरिकी सेयर बजारसमेत प्रभावित भएको छ।
अमेरिकाले इरानी रकेट प्रक्षेपणस्थललाई लक्षित गर्दै पछिल्लो सैन्य कारबाही गरेपछि बजारमा तनाव थपिएको हो। इरानले स्ट्रेट अफ हर्मुजमा नौसैनिक बारुदी सुरुङ बिछ्याउने चेतावनी दिएपछि अमेरिका–इरान तनाव झन् बढेको बताइएको छ।
सोमबार डाउ जोन्स ३७४.०९ अंक अर्थात् ०.७ प्रतिशतले घटेर ५३ हजार १८५.९ अंकमा बन्द भयो। एस एन्ड पी ५०० पनि २५.६२ अंक अर्थात् ०.३३ प्रतिशतले घट्दा नास्डाक ३१.५३ अंक अर्थात् ०.१२ प्रतिशतले ओरालो लागेको छ।
तनावको प्रत्यक्ष असर तेल बजारमा देखिएको छ। डब्लूटीआई कच्चा तेलको मूल्य २.८३ प्रतिशतले बढेर प्रतिब्यारेल ८५.७६ डलर पुगेको छ भने ब्रेन्ट कच्चा तेल २.७१ प्रतिशतले बढेर प्रतिब्यारेल ९०.४९ डलर पुगेको छ।
यसैबीच, फेडरल रिजर्भले आगामी सेप्टेम्बर बैठकमा ब्याजदर बढाउन सक्ने अनुमान पनि बलियो बनेको छ। बजारमा ०.२५ प्रतिशत बिन्दुले ब्याजदर बढ्ने सम्भावना ६२ प्रतिशत पुगेको छ।
तेलको मूल्य बढ्दै जाँदा ऊर्जा क्षेत्रका कम्पनीका सेयरमा भने सुधार देखिएको छ। एनभिडियाको सेयर १.४८ प्रतिशत र टेस्लाको सेयर ५.५१ प्रतिशतले बढेका छन्।
विश्लेषकहरूका अनुसार मध्यपूर्वको तनाव अझ बढेमा तेल आपूर्तिमा असर पर्न सक्ने र त्यसको प्रभाव विश्व अर्थतन्त्र तथा मुद्रास्फीतिमा समेत पर्न सक्छ। अब लगानीकर्ताको ध्यान शुक्रबार सार्वजनिक हुने अमेरिकी गैरकृषि रोजगारी प्रतिवेदनतर्फ केन्द्रित भएको छ।
राष्ट्रिय दैनिक एक लोकप्रिय नेपाली समाचार पोर्टल हो। हामी सत्य तथ्य निश्पक्ष र सन्तुलित समाचार सम्प्रेषण गर्ने तर्फ उद्दत छौँ । हाम्रा टोल,समाज, शहर वा आम जनताका चुलो चौको देखि सदन सम्म अथवा समाजका उदाहरणीय ब्यक्ति, रास्ट्रका पहरेदार हरेक बिषय हाम्रा समाचारका श्रोत हुन् । आवाज बिहिनहरुको आवाजमा साथ अनि सरकारको बेथितिमा हाम्रो निगरानी हुनेछ । हामी राजनितीको रंग भर्दैनौं तर राजनितीको चेतना अवश्य भर्ने छौं ।
