काठमाडौँ, फागुन ७ — ७६औँ राष्ट्रिय प्रजातन्त्र दिवस आज देशभर विविध कार्यक्रमका साथ मनाइँदै छ। २००७ सालको जनक्रान्तिमार्फत निरङ्कुश राणा शासनको अन्त्य भई प्रजातन्त्र स्थापना भएको ऐतिहासिक दिनको स्मरणमा हरेक वर्ष फागुन ७ गते यो दिवस मनाउने गरिन्छ।
राणा शासनविरुद्धको आन्दोलनका क्रममा शहीद भएका दशरथ चन्द, धर्मभक्त माथेमा, गङ्गालाल श्रेष्ठ र शुक्रराज शास्त्री लगायतका वीर सपुतहरूको बलिदानको सम्झनामा विशेष कार्यक्रम आयोजना गरिएको हो। उनीहरूले हाँसीहँसी जीवन उत्सर्ग गरेपछि जनआन्दोलन सफल भई देशमा प्रजातन्त्रको स्थापना भएको थियो।
प्रजातन्त्र स्थापना भएसँगै नेपाली नागरिकले सङ्घीय लोकतान्त्रिक गणतान्त्रिक व्यवस्थामार्फत आफ्ना अधिकारको अभ्यास गर्दै आएका छन्। संवैधानिक रूपमा प्रजातान्त्रिक मूल्य, मान्यता र व्यवहारलाई संस्थागत गर्ने बलियो आधार २००७ सालको जनक्रान्तिले तयार पारेको मानिन्छ।
टुँडिखेलमा मूल समारोह
आज काठमाडौँको सैनिक मञ्च, टुँडिखेलमा विशेष समारोह आयोजना हुँदैछ। मूल समारोह समितिको अध्यक्षता प्रधानन्यायाधीश सुशीला कार्कीले गरेकी छन्। समितिमा नेपाल सरकारका मन्त्रीहरू, काठमाडौँ उपत्यकाका नगरप्रमुखहरू, मुख्य सचिव, प्रधान सेनापति तथा सुरक्षा निकायका प्रमुखहरू लगायत उच्च पदाधिकारी सदस्य छन् भने गृह मन्त्रालयका सचिव सदस्य–सचिवको भूमिकामा छन्।
समारोहमा नेपाली सेनाको विशेष परेड, सांस्कृतिक झाँकी तथा विभिन्न क्षेत्रका उत्कृष्ट व्यक्तित्वलाई सम्मान गर्ने कार्यक्रम तय गरिएको छ।
सार्वजनिक बिदा र शुभकामना
यस अवसरमा सरकारले देशभर सार्वजनिक बिदा दिएको छ। राष्ट्रपति, प्रधानमन्त्री लगायत शीर्ष नेताहरूले शुभकामना सन्देश जारी गर्दै प्रजातान्त्रिक मूल्य र उपलब्धिको रक्षा तथा सुदृढीकरणमा एकजुट हुन आह्वान गरेका छन्।
राष्ट्रिय प्रजातन्त्र दिवसले शहीदहरूको त्याग र बलिदानलाई स्मरण गर्दै लोकतन्त्रको रक्षा, समृद्धि र सुशासनका लागि सामूहिक प्रतिबद्धता जनाउने अवसरका रूपमा महत्व राख्दै आएको छ।
राष्ट्रिय दैनिक एक लोकप्रिय नेपाली समाचार पोर्टल हो। हामी सत्य तथ्य निश्पक्ष र सन्तुलित समाचार सम्प्रेषण गर्ने तर्फ उद्दत छौँ । हाम्रा टोल,समाज, शहर वा आम जनताका चुलो चौको देखि सदन सम्म अथवा समाजका उदाहरणीय ब्यक्ति, रास्ट्रका पहरेदार हरेक बिषय हाम्रा समाचारका श्रोत हुन् । आवाज बिहिनहरुको आवाजमा साथ अनि सरकारको बेथितिमा हाम्रो निगरानी हुनेछ । हामी राजनितीको रंग भर्दैनौं तर राजनितीको चेतना अवश्य भर्ने छौं ।
