विनोद निगम / नवलपरासी , २ पुस।
पश्चिम नवलपरासीको सुस्ता गाउँपालिका–५, पक्लिहवा क्षेत्रस्थित नारायणी नदीमाथि निर्माण गरिएको झुलुङ्गे पुलले नेपालकै सबैभन्दा लामो झुलुङ्गे पुलको पहिचान बनाएको छ। १,५७१ मिटर लामो यो पुलले महाकाली नदीमाथि रहेको कञ्चनपुरको चाँदनी–दोधारा जोड्ने झुलुङ्गे पुललाई ११८ मिटरले पछि पार्दै नयाँ कीर्तिमान कायम गरेको हो।
झुलुङ्गे पुलको निर्माणसँगै यस क्षेत्रमा आन्तरिक तथा बाह्य पर्यटकहरूको आगमन उल्लेख्य रूपमा बढेको छ। दिनहुँ नेपाल र भारतका करिब ५०० भन्दा बढी पर्यटक पुलको अवलोकन गर्न आउने गरेका छन्। यसले नवलपरासीको पर्यटकीय गतिविधिलाई मात्र होइन, स्थानीय आर्थिक क्रियाकलापलाई समेत चलायमान बनाएको छ। पुलको आकर्षणले स्थानीय होटल, रेस्टुरेन्ट र साना व्यवसायहरूलाई प्रोत्साहन दिएको छ भने केही स्थानीय बासिन्दाहरूले रोजगारीको अवसरसमेत पाएका छन्।
पर्यटकको आकर्षणसँगै चुनौतीहरू पर्यटकीय गन्तव्यको रूपमा विकास भइरहेका यस्ता क्षेत्रमा देखिने केही चुनौतीहरू पनि यो क्षेत्रमा उभिएका छन्। पर्यटकहरूको सुरक्षाका लागि प्रहरी प्रशासनको उपस्थिति कमजोर रहेको गुनासो स्थानीयहरूले गरिरहेका छन्। पुल क्षेत्रको बढ्दो भिडभाडका कारण पर्यटकहरू आफू असुरक्षित महसुस गरिरहेको बताउँछन्।
एक स्थानीय बासिन्दाका अनुसार, “यहाँ पर्यटकको चाप दिन प्रतिदिन बढिरहेको छ। तर, प्रहरी प्रशासनको उपस्थिति नहुँदा पर्यटकहरूले डराई–डराई पुल अवलोकन गरिरहेका हुन्छन्। पुलमा मोटरसाइकल चलाउने प्रवृत्तिले पैदल यात्रुहरूलाई समस्या मात्र होइन, गम्भीर दुर्घटनाको सम्भावना पनि निम्त्याएको छ।”
पर्यटनको अवसर र प्रशासनको भूमिका
यस क्षेत्रमा पर्यटकहरूको बढ्दो आकर्षणले विकासका थुप्रै सम्भावनाहरू खुला गरेको छ। यद्यपि, स्थानीय सरकार र जिल्ला प्रशासन कार्यालयले आवश्यक पूर्वाधार विकास र सुरक्षा व्यवस्थामा चासो नदिएकोप्रति स्थानीयवासी असन्तुष्ट देखिन्छन्।
झुलुङ्गे पुलको संरचनागत विशेषता मात्र होइन, यसको ऐतिहासिक र पर्यटकीय महत्त्वले नेपाललाई थप पहिचान दिन सक्ने सम्भावना छ। तर, यसका लागि प्रशासनले पर्यटकीय गन्तव्यको सुरक्षा, व्यवस्थित पार्किङ, मोटरसाइकल प्रवेशमा नियन्त्रण, र पर्यटक मार्गदर्शनको प्रबन्ध गर्न आवश्यक देखिन्छ।
पुलले भारत र नेपालका पर्यटकहरूलाई जोड्ने मात्र होइन, सीमा क्षेत्रका समुदायबीच सांस्कृतिक र आर्थिक अन्तरक्रियालाई समेत बढावा दिएको छ। यदि स्थानीय सरकार, प्रशासन, र समुदायले सहकार्य गरेर क्षेत्रलाई अझ व्यवस्थित र सुरक्षित बनाउन सक्यो भने यो पुल पश्चिम नेपालकै पर्यटकीय आकर्षणको प्रमुख केन्द्र बन्न सक्नेछ।
नारायणी नदीमाथिको यो झुलुङ्गे पुल नवलपरासीको पर्यटन विकासको ढोका मात्र होईन, समग्र पश्चिम नेपालको पर्यटन क्षेत्रमा नयाँ युगको सुरूवात पनि हो। यस्ता संरचनाहरूलाई दीर्घकालीन रूपमा सञ्चालन गर्न आवश्यक सुरक्षा, व्यवस्थापन, र योजना बनाउन सम्बन्धित सबै निकायको ध्यान जानु अपरिहार्य छ।
राष्ट्रिय दैनिक एक लोकप्रिय नेपाली समाचार पोर्टल हो। हामी सत्य तथ्य निश्पक्ष र सन्तुलित समाचार सम्प्रेषण गर्ने तर्फ उद्दत छौँ । हाम्रा टोल,समाज, शहर वा आम जनताका चुलो चौको देखि सदन सम्म अथवा समाजका उदाहरणीय ब्यक्ति, रास्ट्रका पहरेदार हरेक बिषय हाम्रा समाचारका श्रोत हुन् । आवाज बिहिनहरुको आवाजमा साथ अनि सरकारको बेथितिमा हाम्रो निगरानी हुनेछ । हामी राजनितीको रंग भर्दैनौं तर राजनितीको चेतना अवश्य भर्ने छौं ।
